SCHLIESSEN

Suche

Jahreslosung

Wer to mi kümmt, den schick ik nich to Hus

13.01.2022 | „Wer to mi kümmt, den schick ik nich to Hus“
So klingt dat för uns in de Jahreslosung in dat nie Johr 2022 (Joh. 6,37). Een echtes Jesus Woort. Johannes het dat för alle Tieden upschreven, domit dat nich verloren geiht. Jesus vun Nazareth seggt dat to de Lüüd, de he vörheer satt mokt hett; fiefdusend Lüüd mit fief Broten un twee Fischen,. Dat weer een Wunner. Keeneen schickt he to Hus, jedereen beschenk he.

Parkbank am Eutiner Schloß
Parkbank am Eutiner Schloß

Und he seggt ok, “Ik bün dat Broot för dat Leben…”Dat nie  Leben, dat kannst du smecken un föhlen. Du büst nu in de Neeg vun Gott.  Du lihrst dorbi, ok deelen mokt riek…

Un wi  mööt  in disse Tied, de so anners is, ok in dat nie Johr torech komen, ob wie wüllt oder nich. Männich Lüüd staht alleen vör groote Fragen. Bliv ik gesund, hölpt dat Empen? Wokeen dörf ik besöken? Is dor een, de mit mi schnacken deit? To`n Glück gifft dat  Minschen, de hölpt sik gegensiedig. De een makt en Inkoplist för de Naabers oder bringt em to sien Doktor.  De anner kiekt na de ole Fründ, de bannig alleen is, un klönt mit em.  Un de Organist vun de Kark in de Stadt, he speelt to Mittag vun de Karkturm Choräle, de wi kennt :”Dor kümmt en  Schipp, is laden bit an sien böwerst Boord, driggt Gott sien Söhn vull Gnaden, bringt uns dat ewig Woort.”Oder:” Dat niee Jahr is kamen, in Jesus sienen Namen laat fröhlich mit de annern in´t frömde Land uns wannern”...

All dat sünt Melodien vull von Leef un Neegte. Denn jedereen hett en Gaav vun Gott kregen för sien Lebensreis. Vörlesen, Besöök maken, inkopen, ok för anner Lüüd, Musik speelen un Singen.  Graad  in disse Tied, de so anners is. Laat uns gegensiedig hölpen und een för den annern ganz eenfach dor sien. 

Un so möög dat warn in dat nie Johr : Mannig Tied för dat Gode, för dien Familie un dien Frünnen, för dien Arbeit un dien Freid. 

Gott wohr di Liev un Leven.

Pastor i.R. Lorenz Kock, 23730 Neustadt-Pelzerhaken